[center][b]دقت ساعة الصفر[/b]
[b].....[/b]
[b]....[/b]
[b]...[/b]
[b]..[/b]
[b].[/b]
[b]اليوم الأول من الشهر الرابع
إنه اليوم المنتظر....يوم القبض ..يوم المعاش....يوم الراتب الأعظم
اليوم الذي انتظرته الملايين......اليوم الذي حطيت كل أملي فيه لأخلص من عذابي وشقائي المادي الذي دام ثلاثين يوما.
رن المنبه مع اني كنت فايق قبلو
نطيت من التخت ع المراي غسلنا وجهنا وفرشينا السنان ومشطتنا الشعرات
وانطلقنا نحو الخزانة(هي بالحقيقة عبارة عن جرار صغير بس انا بحب سميها خزانة)
لبسنا اجدد بنطلون عندي (كمان بالحقيقة ما عندي غيرو لانو البنطلون التاني مبخوش)
ولبسنا قميص أبيض (يلي مستعيرو من رفيقي أب سمرة)
وانلطقت لروح استلم ورحب وأهل وسهل بالاستاذ راتب يلي طال انتظاره طال.
وانا صرت جنب بيت جارنا أب عبدو المشكلجي سمعتو كأنو قابض راتبو وما بس هيك إلا رافع راتبو فلقة وعما يعيط ويقلو
هات لشوف يا كلب ليش ما عما تكفينا لأخر الشهر اعترف يا جبان.
هون غصيت شوي بس ما أخدت وعطيت وحاولت ما كسر من طموحاتي وأمالي.
ضليت ماشي لصرت جنب بيت جارنا المدير العام
لئيت ولادو والراتب عما يركبو السيارة التيوتا كامري وئال شو ئال الراتب عازمهم على على كاسة جامايكا بقهوة كونترا
(يلي هي قهوة الكواترو بشارع الحمرا بحمص بس أهل الحارات الشعبية بسموها الكونترا لانو كلمة كواترو صعب تتطلع معهن)
اي انا هون ارتفعت معنوياتي شوي
ولسا ما وصلت على باب المديرية لئيت راتبي عما ينتظرني ع الدرج
بس كان المنظر ما بسر لا عدو ولا صديق كان الاستاذ راتب نحفان وضعفان ومعصمص وعلائم المرض على وجهو
ع السريع ركضت لعندو وأخدتو من ايدو وقلتلو بس ما كون أتأخرت عليك
وقف ومشي معي والتم ساكت وعما يئلي دخيلك خدني ع البيت
اخدتو ع البيت وخليتو يتمدد ع التخت(يلي هوي بالحقيقة حصيرة فوقها فرشة ولحاف بس جرت العادة سميه تخت)
ئتلو خير شو صاير معك
فرد عليي الراتب وئلي اي هلكت لوصلت لعندك
اي كل ما مر على موظف يشيل شقفة مني على انها تبرع
والتاني ينتف مني على انها تأمين
والتالت والرابع والخامس ووووو........
لهيك لوصلت لعندك
وأضاف الراتب قائلا: حاسس حالي بدي موت قريبا
ع السريع رديت عليه وانا عم أبكي وما سكلو ايدو ئتلو شد حيلك يرضى عليك لسا الدنيا أول الشهر وين تموت من هلأ اي والله بلحئك دغري
المهم ضليت عما داري وحافظ على سلامة الراتب وحاول ما أخد منو شقفي إلا بالاحوال الضرورية
بس .............. الراتب مات بعشرة الشهر
وقعدت مسكت العدة يومين حسرة ع الراتب المظلوم مدري انا المظلوم فيو ما بعرف
وقعدت استنى اول الشهر الجاي كالعادة أملا مني بإنو يجيني شي واحد من عائلة الراتب ويفرج كربتي
بس يا خوفي يطلع هالضعف والهزول والعصمصة مرض وراثي عندهن[/b][/center]