يا من حلب
يا من حلب
يا من الشام
هالحنة شمالية .....
حنيت ايديك
يا بو خطوط محنية
بيلبقلك التوب
والشملة الشامية
لك سحاب سيفك وغني
بتلبقلك الغنية
مكتوب ع السيف
والكلمات كوفية
مكتوب حبيت
والباقي حروف ممحية
************************************
عتمة خياله
لو كان عندي فرس
لضلّ عالعالي
بس ندهيني
بنزل على خيالي
يا بنت راعي الغنم
هالموت مقبالي
ردّوا معي البواب
جايي هوا شمالي
في ناس
قالوا قتل
في ناس
قالوا مات
في ناس
قالوا فتح عتمة خياله
وفات
********************************************
مَ دام
مَ دام
نوم ولادهن طيّر ورق بالسهل
مَ دام
ما عاد بدهن يخلوا الصبي
يدقدق جراس النحل
مَ دام
إيديكِ البيوت الفاضيه
مَ دام
ما بَقْ في حدا
غير القفاص العاليه
وغير الصدى
مَ دام
إيديكِ السهول
مَ دام
بس تلململي دَيْكي
بيتلملموا طراف الحقول
مَ دام
مهما قلت
رح أسكت ع طول..
ما عاد بدي قول
**********************************
قصيدة فخار
نيال فخارا لهالجره
فرحان عندو عيد
بيشرب ع طول نبيد
سكران عمرو ما صحي مرّا
ومدري خدودو ليش محمرّا
تخمين بوّس شي مرا سمرا
تمّا غفي عا تمّ هالجره
***************************
فوق
كان في غصن بردان
ع مرجة هلي
سألتن لمين الطقس
قالولي إلي...
وطلعت اتفقد إذا ردوا البواب
وبقيت فوق
وما حدا قللي نزلي
*********************************
وهي وحدة مني
مشتاق
إيديّي غمر مفتوح متل النون
معجّل
متل جملة ما فيها سكون
ولا بنهدى
والوقت ما عنده وقت ينطر حدا
يمكن أنا مجنون
هيّ ِ
متل شي خط بريشة قصب
وهوّ ِ
متل حرف العرب
مرفوع بالضمة
منصوب بالفتحة
وبالفتحة هرب
بس يكتروا ببالُه
بيصير واو ونون
وبس يسكن بحاله
بيصير همزه
أو بيصير سكون
قرآن مفتوح بهدا
متل المصلاّية
نقّوا شي سوه هينه
تنبلش قرايه
وعبله على ضهر الفرس
حلوه متل آيه
كل الحروف منكسّه
إلا الألف رايِه
ألله شو حلوه الألف
بس تنحكى حكايه
سبعه لغات العرب
عندي مخباية
ع كتر ما القوس انحنى
صار السهم غايه
هـ الأرض
اسوارة دهب
زينه مضوايه
جبلي بطريقك حلق
إدني.. معرّايه
وصيت صايغ حلب
قللي الحلق جايي
وضاعت
يا مين يلاقيا
وياخد هـ المرايه
هذه قصيدة للشـاعر طلال حيدر اسمها :
بلاد مقوّصة
*********************************
نمت
فتكروك ولد غفيان
قرّبوا منك يحاكوك
لقيو بحيرة مي
وجّك متل رجعة ولد
بعد الغياب
وجّك متل تلة
وعم تصرخ دياب
يا عمر
ما بيلحق يجي تيروح
وجّك
متل بيرق عزا
من بعيد عم يلوح
انت
بيت اهلي
ورد عم ارفعو
تسيّج الحقلي
انت بلاد مقوّصة
وعم تنقتل قبلي
انت
وهبّط يا منام
ووعيا متلي
واقف على سهل البقاع
ملثّم بشمله
بصرّخ
وصوتي ضايع
وقالوا الهوا قبلي
يا بيت اهلي
يا سطيحات الحمام
يا دعس عالي
فوق تلجات المنام
متل اللغات القديمة ع ورق بُردا
نامت وما عاد حدا شاف بنام من بعدا
كان مارق الطقس قبل شوي من حدا
والمي زرقا متا جايي السما بالصيف لعندا
وطارت عصافير الأساور ما حدا ردّا
عم يقطفوا الولاد بنومن ورد
وعم يوقع الورد من نومن على خدّا
***************************